Ligji Nr.111/2017 për Ndihmën Juridike të Garantuar nga Shteti, përcakton format, kushtet, procedurën dhe rregullat për organizimin dhe administrimin e ndihmës juridike të garantuar nga shteti, me qëllim mbrojtjen e të drejtave themelore të individit dhe interesave të ligjshëm të tij. “Ndihmë juridike” është shërbimi juridik falas dhe shërbimet e tjera të parashikuara në ligj, për personat që përmbushin kriteret e këtij ligji, të cilat garantohen dhe financohen nga shteti. 

Ndihmë juridike ju ofrohet shtetasve me të ardhura dhe pasuri të pamjaftueshme si dhe kategorive vulnerabël, pavarësisht të ardhurave dhe pasurisë së tyre si më poshtë:

1. viktimave të dhunës në familje;
2. viktimave të abuzimit seksual dhe viktimave të trafikimit të qenieve njerëzore;
3. viktimave të mitur dhe të miturve në konflikt me ligjin;
4. fëmijëve, të cilët jetojnë në institucionet e përkujdesjes shoqërore;
5. fëmijëve nën kujdestari, të cilët kërkojnë të nisin një proces pa miratimin e kujdestarit të tyre ligjor ose kundër kujdestarit të tyre ligjor;
6. personave që përfitojnë nga pagesa për aftësi të kufizuar;
7. personave, të cilët i nënshtrohen trajtimit të pavullnetshëm dhe trajtimit vullnetar në institucionet e shërbimit të shëndetit mendor;
8. personave, ndaj të cilëve kërkohet heqja ose kufizimi i zotësisë për të vepruar;
9. personave, të cilëve u është hequr ose kufizuar zotësia për të vepruar, që kërkojnë të nisin një proces kundër kujdestarit të tyre ligjor, për rifitimin e zotësisë për të vepruar, pa miratimin e kujdestarit ligjor;
10. personave, të cilët janë përfitues të skemave të mbrojtjes sociale;
11. personave, të cilëve u është cënuar e drejta nëpërmjet një veprimi ose mosveprimi që përbën diskriminim, bazuar në vendimin e organit kompetent, sipas legjislacionit në fuqi për mbrojtjen nga diskriminimi.

Ligji nuk përcakton nëse sinjalizuesi kualifikohet për ndihmë ligjore. Nëse një person, i cili sinjalizon mbi një veprim ose praktikë të dyshuar korrupsioni, ka të ardhura dhe pasuri të pamjaftueshme ose i përket ndonjërës prej kategorive të veçanta të përmendura më sipër, i ofrohet ndihmë juridike falas.

Ndihma juridike ofrohet nga punonjës me trajnim të posaçëm, organizata jofitimprurëse dhe nga klinikat ligjore të ngritura pranë institucioneve të arsimit të lartë. Informacion të mëtejshëm mund të gjeni në faqen zyrtare Web të Drejtorisë së Ndihmës Juridike Falas NDIHMAJURIDIKE.GOV.AL si dhe në faqen zyrtare Web të Ministrisë së Drejtësisë DREJTESIA.GOV.AL.