Agjencia për Ndihmë Juridike Falas në Kosovë, ofron ndihmë juridike në çështjet e procedurës civile, penale, administrative dhe kundërvajtëse. Përfitues të ndihmës juridike falas nga kjo Agjenci mund të jenë personat të cilët i plotësojnë kriteret e përcaktuara në Ligjin për Ndihmë Juridike Falas. Sinjalizuesit nuk janë një kategori që përfiton automatikisht nga ndihma juridike falas. Për të marrë ndihmën juridike falas, ata duhet të plotësojnë kriteret e përcaktuara në Ligjin për Ndihmën Juridike Falas, të cilat janë kriteret e kualifikimit, kriteret financiare dhe kriteret ligjore.

Ndihmë Juridike në këtë fushë ofron edhe Qendra për Ndihmë Juridike e Institutit të Kosovës për Drejtësi. Kjo qendër ofron ndihmë juridike falas për sinjalizuesit e rasteve të korrupsionit në përputhje me Ligjin për Mbrojtjen e Sinjalizuesve në Kosovë. Ndihma juridike falas që ofrohet nga kjo qendër përfshinë, por nuk kufizohet në ofrimin e këshillave ligjore lidhur me të drejtat dhe obligimet e sinjalizuesve, dhënien e këshillave apo përfaqësimin me avokat në rast të shkeljes së të drejtave të sinjalizuesve dhe formave tjera që kanë për qëllim promovimin dhe respektimin e të drejtave të sinjalizuesve qoftë pranë organeve administrative apo gjyqësore.